Héraðsskjalasafn Rangæinga og Vestur-Skaftfellinga

Héraðsskjalasafn Rangæinga og Vestur-Skaftfellinga var formlega stofnað árið 1986.

Að safninu standa sveitarfélögin Ásahreppur, Rangárþing ytra, Rangárþing eystra, Mýrdalshreppur og Skaftárhreppur. Sveitarfélögin og undirstofnanir þeirra eru afhendingaskyldir aðilar gagnvart skjalasafninu og hefur skjalasafnið því lögbundna hlutverki að gegna að varðveita skjöl sveitarfélaganna, bæði hinna fornu hreppa, og þeirra fimm sveitarfélaga sem nú eru til staðar.

Skjalasafnið hefur lögbundna eftirlitsskyldu gagnvart sveitarfélögunum og því er ætlað að vinna náið með sveitarfélögunum með það að markmiði að tryggja örugga meðferð og vörslu skjala með réttindi íbúa, hag stjórnsýslunnar og varðveislu sögu sveitarfélagana að leiðarljósi. Skjalasafnið býr fyrst og fremst yfir skjölum sveitarfélaganna og undirstofnana þeirra auk skjala frá fjölda félaga, fyrirtækja og einstaklinga.

Sumarið 2020 voru skannaðar fundargerðarbækur sveitarfélaga allt frá 1852 og talsvert fram á síðustu öld. Úr Rangárvallasýslu hafa verið skannaðar 3.357 blaðsíður og úr Vestur-Skaftafellssýslu 3.088 blaðsíður. Hægt er að nálgast efnið á vef Héraðsskjalasafns Árnesinga sem heitir www.myndir.myndasetur.is. Þar eru að auki að finna 26.000 myndir frá Ottó Eyfjörð sem flestar eru úr Rangárvalla- og Skaftafellssýslu. Einnig hafa um 8.000 myndir úr skjalasafninu verið skannaðar inn á vefsíðuna www.sarpur.is sem er menningarlegt gagnasafn.

Héraðsskjalavörður skjalasafnsins er Árný Lára Karvelsdóttir og er við á skjalasafninu í Skógum milli kl. 10 - 14 á mánudögum og þriðjudögum og á skrifstofu Rangárþings eystra milli kl. 10 - 14 á miðvikudögum.

Hægt er að senda fyrirspurnir á netfangið: arnylara@skogasafn.is