Númeraspjald úr Gullskipinu

Sumir kannast kannski við nafn skipsins. Het Wapen van Amsterdam var frá Hollandi en var á leið heim frá Indónesíu, enda kaupskip Austur-Indíafélagsins. Því hafði verið siglt norður fyrir Bretlandseyjar af ótta við árás breskra herskipa, enda Bretar og Hollendingar þá í stríði. Við Hjaltlandseyjar beið það eftir fylgd frá herskipaflota. Þaðan hraktist það til Íslands undan stormi og strandaði hér. Það var lengi draumaskip fjársjóðsleitarmanna á Íslandi, en heimildir um strandið bentu til þess að það hefði borið með sér gull og gersemar. Færri vita að þetta var eitt mannskæðasta strand sem hefur átt sér stað við Íslandsstrendur, en 200 manns voru um borð í skipinu og um 140 fórust. Aðeins náðist að bjarga 50-60.

Talið er að skipverjar hafi gert sitt besta til að bjarga öllu sem þeir gátu úr Het Wapen, en samkvæmt lögum var þetta vogrek og allt góss tilheyrði danska konungnum. Hollendingar voru ekki sáttir við þetta og töldu sig eiga flakið. En veturna 1667-1668 tókst sýslumönnum samt að koma miklu af varninginum til Bessastaða.

Skipið heillaði marga áratugum saman sem töldu það fullkomlega varðveitt undir sandinum ásamt gersemum sínum og þekkja það margir bara sem „gullskipið“. Nokkrum sinnum hafa verið gerðir leiðangrar til þess að finna það. Þær umfangsmestu eru kenndar við Berg Lárusson frá Kirkjubæjarklaustri og Kristinn Guðbrandsson í Björgun, milli 1960-1983. Meira má lesa um sögu strandsins og ýmsar leitir að gullskipinu fræga á https://eldsveitir.is/2020/01/05/gullskipid-strandadi-1667/